----------------ثلاثيات--------------
أمل
-------
يبقى الحجر صوان
ومحالة ييجى فى جنب...
تبص تلفت عنيك
وتقول دا ينطق؟ صعب!
تصبر تكون كلمته
نبعه وورده ودرب... وعجبى
-----------------------------------------
نظرة
-------
عاملنى زى البشر
وكفاية تتغابى
واعطف عليّا بقى
هو إحنا فى غابة؟
الكرسى ولّا العيش
يا سلطة غلابة... وعجبى
-------------------------------------
سفه
------
قال السفيه للغبى
أنا أغبى منك وأجهل
أنا كنت عارف حقيقتى
وصممت ما أخجل
عيبى وعميت عنه
لحد ما استفحل... وعجبى
---------------------------------
هدم
-------
لو هدوا بيت الولى
على راس مريدينه
وضاع أمان البلد
والعبد خان دينه
دا يبقى زمن الجهالة
وأبالسة سايدينه... وعجبى
------------------------------------
وصاية
--------
مين عينه فى الأرض
يا خلق مين خلّاه
يمشى كدا بالعرض
يفسد فى خلق الله
ما ترد لو فى رد
ولا انت صوت وآداه... وعجبى
--------------------------------------
كفاية
-------
سواد القلب لو سبناه
وهوناه يهد الصبر
دا ضيّع كام سنة م العمر
وخلى الحلو يطرح مر
كفاية دا التاريخ إنتم
ولو هنتم يهون العمر...وعجبى
-----------------------------------
سيد فهيم
نشرت بالمصرى اليوم5-11-2011
راقت لي كثيراً... أكثر من رائعة
ردحذفالشكر موصول لك استاذنا الفاضل ومرورك هنا يثلج صدري وشهادتك تدفعني
ردحذف