فؤادى بيهّمس
فى ودن الكويس
صباحكم مشمّس
مُذكر مؤنث
بلدكم دى تهوس
بتقلع وتغرس
وتحصد وتدرس
وتاكل وتهرس
وجوهكم بريئه
ونيلكم مقدس
خضاركم مجنس
بيبهج ويرقص
وقعدتكوا حلوه
وكلامكم ملمس
وصلى ع إللى
هدانا وأسس
***
تصبح تغمس
بفولنا المدمس
وعيشنا بيغطس
ملدّن محمّص
وقهوه عتيقه
وخمسينه وإحبس
وأنتخ فى حارتك
ومدد وكرفس
تنادى لصبحى
تزعق تهيص
وتغمز لفتحى
من الضحك يفطس
وتذكر نبينا
الهمام المخلص
تحلى يا امى
أحلى وأكبس
هريسه ومشبك
بطاطا وترمس
وثوبيا وبوظه
أرتب أو أعكس
****
وقدام عتبها
حبيبتى بتكّنس
هعدى وكأن
الخطاوى بتخلص
وهرمى سلامى
وبعديها هخرس
ولو تبتسملى
فى حيطه راح البس
رموشها سيوفى
عيونها بتنعس
فؤادى عشقها
وخدها وتربس
ماشالله عليكى
بشوفك بهلوس
****
بلدكم دى تهوس
ترابها مقدس
هنبنى هتعلى
نكسل تتيس
بتنكت عدوك
وترمى المخنس
فكون ليها جندى
وإحمى وإحرس
وإياك تسيبها
لغيرك يدنس
ترابها بغله
وحقده المخيس
بلدكم وروحها
ماشالله وخمس
مفيش منها تانى
فحافظ واسس
وانا منى سيد
محارب ومخلص
بقلمى وريشتى
فدا أرض أحمس
***********
قلم |سيد فهيم
ليست هناك تعليقات:
إرسال تعليق